من مدونة: ضحك وجد ولعب : ( سندريلا ) المصرية

استعرض الموضوع السابق استعرض الموضوع التالي اذهب الى الأسفل

من مدونة: ضحك وجد ولعب : ( سندريلا ) المصرية

مُساهمة من طرف Admin في الإثنين 21 يوليو 2008, 8:04 pm

( سندريلا) باللهجة المصرية


بعد ان تم عرض سندريلا اكثر من مرة باللهجة الفلسطينيةفي بعض المنتديات هاأنذا اليوم اقدم لكم سندريلا باللهجة المصرية :

زوجة الأب : انتي يامنيلة على عينك ياللي اسمك سندريلا .
سندريلا : أيوه يامرات أبويا
زوجة الاب : جكي أوا ، امشي يامقصوفة الرقبة روحي للاسطى حنفي المكوجي وهاتي فساتين اخواتك عشان نروح الحفلة بتاعة المعلم ابو دومة
سندريلا : وانا مش هاجي معاكو يامراة ابويا ؟؟؟
زوجة الأب : ههيئ ، لما تبقي تلاقي حاجة نضيفة غير الجلابية ام سفرة والشبشب ابو وردة اللي عندك نبقى ناخدك، خدك عزرائيل الموت
سندريلا تبكي في صمت وتذهب لدكان الاسطى حنفي
الاسطى حنفي : اهلا بنوارة الحتة ، ياصفايح الزبدة السايحة ، يابراميل القشطة النايحة
سندريلا : اختشي يامعلم ، كويت الفساتين ؟
حنفي : ده اللي قلبي انكوى ياكوز البطاطا
سندريلا لنفسها : ياباي عليك راجل ، هلاقيها منك ولا من العقربة اللي في البيت ؟ طب اديني الفساتين يامعلم احسن الست جمالات مراتك باين لها جاية على باب الحارة
حنفي : يانهار اسود ومنيل ، يانهار مش فايت ، طب خدي الفساتين ياسندريلا وانخفي من قدامي دلوقت لحسن الولية دي مابترحمش ، ياأهلا ياأهلا
زوجته : لاأهلا ولاسهلا ، نهارك زي وشك ، بتبصبص لبت قد عيالك ياراجل يابو عين زايغة، مش هتفلت من ايدي انهاردة، تجري وراءه داخل الدكان فيقفز هو للخارج من فوق البنك محاولا الهرب
وتنصرف سندريلا ضاحكة الى البيت


سندريلا تعود للبيت من عند المكوجي فتستقبلها نفيسة (اختها من الأب) على الباب قائلة بلهجة ساخرة : اهلا اهلا ، شرفتي وآنستي ، اتاخرتي ليه ياست سندريلا ؟؟؟
درية (الاخت الثانية) : طبعا كانت بتتسكع زي عادتها في الحارة ، فاكرة الناس كلهم بيحبوها، على ماتقف مع ده شوية وتحكي مع دي شوية .
نفيسة لسندريلا : هاتي بقى فستاني ، ياسلام عالجمال
درية تخطفه من يدها : لا ، ده فستاني انا، هاتيه
نفيسة : سيبيه يام غل ، مش فستانك ، ياماماااااااااااااااااا
الأم : قطيعة تقطع ماما وسنين ماما ، قطم رقبتك على صدرك منك ليها ، يالا البسوا بسرعة عشان نلحق الحفلة ، انا لسة من شوية شايفة دومة عند الاسطى مدبولي الحلاق بيستعد للحفلة.

نفيسة ودرية تتنهدان في صوت واحد : دوومة ، ياسلااااااااااااااام

المشهد التالي : الام تطرق باب شقة المعلم ابو دومة ومعها نفيسة ودرية في احسن صورة واقفتان في خجل .

أم دومة تفتح الباب : ياالف اهلا وسهلا ، خطوة عزيزة ياختي ، داحنا زارنا النبي ، اتفضلي ياست ام نفيسة ، ودي مين دي ؟ نفيسة ؟ ولا كبرتي يابت وبقيتي عروسة تعالي اما ابوسك ، أومه أومه ، ودي مين دي رخرة ؟ درية ؟ والله ماعرفتك يامضروبة ، ايه يابت الحلاوة دي كلها ؟ ابوسك انتي كمان ، أمه أمه ، نعالوا اتفضلوا ، المعازيم كلهم موجودين في الصالة ، ربنا يجعله من نصيبك يادرية أو انت يانفيسة ، قادر ياكريم ، اتفضلي ياحبيبتي ، بيتك ومطرحك .




بعد دخول درية ونفيسة والأم الى بيت المعلم ابو دومة وجدوا الصالة ممتلئة ببنات الحتة

درية : بصي يانفيسة مش دي البت عواطف بنت ام سيد الدلالة ، دي شكلها هتاكل الجو مننا، ايه اللي جابها
نفيسة : بصي شوفي مين هناك كمان ، دي بدرية بنت ام بدرية مراة عم عوف القهوجي، استرها يارب استرها .



درية : بصي يابت يانفيسة ، شايفة البوفيه اللي مليان أكل هناك ده ؟
نفيسة : ياسلاااااام ايه ده ، فتة باللحمة الضاني ؟ وايه ده كمان فتة كوارع بالتوم ؟ ومحشي أشكال وألوان ، ومسقعة
درية : واللا الملوخية بالأرانب ، لا ولا المشاريب ، عرقسوس وتمرهندي وسوبيا مرة واحدة .
نفيسة : والحلو براغيت الست وصوابع زينب وام علي .
الأم : بس بقى كفاية فضايح فضحتونا ، استنوا أنا سامعة خبط عالباب ، ده بايل دومة وصل من عند الحلاق .

نعود الآن لسندريلا وهي جالسة تبكي في المنزل فتسمع صوت طرقات على الباب .
سندريلا : مييييييين
بهلول : انا عمك بهلول ياسندريلا، افتحي يابنتي
سندريلا : اتفضل ياعم بهلول ، ايه اللي جابك دلوقت ؟
بهلول : ماعندكيش حاجة اكلها يابنتي ؟
سندريلا : اتفضل فيه شوية كشري باقيين من امبارح، بسم الله
بهلول : هم هم ، مال دمعتك على خدك يابنتي ؟
سندريلا : قسمتي السودة .
بهلول : ليه كفى الله الشر ؟
سندريلا : اهئ اهئ ، عاوز اروح الحفلاااااااااااااااااا
بهلول : بسيطة ، قومي روحي
سندريلا : ازاي وانا ماعنديش غير حبة الهلاهيل دي ؟
بهلول : ولايهمك ، أنا هتصرف ، قومي بينا على عم قرني بتاع القماش اللي على ناصية الحارة
بهلول : ساالخير ياعم قرني ، انا قاصدك في خدمة الله لايسيئك، ربنا يوقف لك ولاد الحلال.
قرني : نعم ايتها خدمة ؟
بهلول : عاوزين كم متر قماش نعملهم فستان لسندريلا عشان تروح حفلة ابو دومة.
قرني : اتفضل آدي متر قماش .
بهلول : ياراجل خلي عندك نظر ، هو احنا هنفصل فانلة داخلية ؟ بقولك فستان ، بحبح ايدك
شوية
قرني : آدي كمان نص متر .
بهلول : ياعم فكها شوية عشان ربنا يفكها عليك
قرني : عاوز ايه تاني ؟
بهلول : خليك جدع وهات كمان 5 سم
سندريلا : طب هنخيطه ازاي ده ياعم بهلول
بهلول : ماتخافيش ، يرفع صوته يااهل حارة المناويشي ، يااهل الحارة

واستأذنكم في اكمال القصة لو اعجبكم هذا الجزء والى اللقاء .





كتبها خالد محروس عثمان في 07:00 مساءً ::
avatar
Admin
Admin

عدد الرسائل : 72
عين الحياة : عين الحياة
تاريخ التسجيل : 23/04/2008

معاينة صفحة البيانات الشخصي للعضو http://sohsah.getgoo.net

الرجوع الى أعلى الصفحة اذهب الى الأسفل

رد: من مدونة: ضحك وجد ولعب : ( سندريلا ) المصرية

مُساهمة من طرف Admin في الإثنين 21 يوليو 2008, 8:06 pm

اشكر الكاتب المحترم الاستاذ ( خالد ) علي ابداعاته
avatar
Admin
Admin

عدد الرسائل : 72
عين الحياة : عين الحياة
تاريخ التسجيل : 23/04/2008

معاينة صفحة البيانات الشخصي للعضو http://sohsah.getgoo.net

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى